Тік тұрып кетуіне тілектеспіз
Өткен аптада көлік апатына түскен Еркін Нұржанов туралы ел ішінде гу-гу алып-қашпа әңгіме қаптап кетті. Жеңіл ауыздар онсызда көңіл-күйі мәз емес әншінің денсаулығын сан-саққа жүгіртіп, бірінен-бірі асып түсіп жатыр. Бірі – «Еркіннің екі аяғы істемей қалыпты» десе, енді бірі – Құдай бетін аулақ қылсын, одан да сорақасын айтуда. Оған сенер-сенбесін білмей, екіұдай күйге түскен халық редакцияның телефонына маза берер емес.
Біздің айтпағымыз, қазіргі таңда бес қабырғасы сынып, ауыр дене жарақатын алған әнші жігіттің беті бері қарады. Бірнеше күннен бері күні кеше ғана ыстық сорпа ішіп, өз-өзіне ақырындап келе бастаған. Дәрігерлердің рұқсатымен оған марқұм Нәби Аймұратовтың қаза тапқаны туралы қаралы хабарды үлкен ақсақалдар мен имам-молдалар естіртіпті. Сондықтан әрқайсысымыз жамандық шақырмай, Еркіннің аман-есен қатарға қосылып, аяғынан тік тұрып кетуіне тілектес болғанымыз жөн болмақ.